Данияр Елеусінов Сондерстің бокс кешінде айқасады
АСТАНА. ҚазАқпарат - Данияр Елеусіновтің (3-0, 1 КО) мүддесін ұсынатын Matchroom Boxing промоутерлік компаниясы оның кәсіби рингтегі төртінші айқасы туралы жария етті, деп хабарлайды Sports.kz.
Бұдан бұрын хабарланғандай, Елеусінов 20 қазанда Бостонда (АҚШ, Массачусетс штаты) жекпе-жек өткізеді. Оның қарсыласы әзірге белгісіз. Геннадий Головкиннің әлеуетті қарсыласы - орта салмақтағы WBO чемпионы Билли Джо Сондерс (26-0, 12 КО) пен Деметриус Андраде (25-0, 16 КО) хедлайнер болады.
«Дауыл Бостонға қарай бара жатыр... #СондерсАндраде #ҚазақКүрсілі», - деп жазды Matchroom Boxing туиттерде.
Еске салайық, Данияр Елеусінов соңғы айқасын 4 тамызда өткізген еді. Ол Кардиффте (Уэльс) венгриялық Габор Горбичты (26-12, 16 КО) ұпай бойынша жеңген болатын.
