Дәрі-дәрмектер бойынша отандық өнімнің үлесі қандай
АСТАНА. ҚазАқпарат - Зертханалық сынақтан өтпей қалған дәрі-дәрмектердің жартысынан көбі - шетелдік. Бұл туралы ҚР ДСМ Дәрілік заттарды, медициналық мақсаттағы бұйымдарды және медицина техникасын ұлттық сараптама орталығы бас директорының міндетін атқарушы Қанат Ержанов айтты, деп хабарлайды ҚазАқпарат тілшісі.
«Біздің орталық қызметкерлері сапа және қауіпсіздік параметрлері бойынша шетелдік дәрі-дәрмектермен бірге отандық дәрілерге де сынақ жүргізеді. Сапа жағынан сынақтан өтпей қалған дәрі-дәрмектер бойынша отандық дәрілерден гөрі шетелдік медициналық өнімдердің үлесі көптеу. Зертханалық сынақтан өтпей қалған дәрі-дәрмектердің жартысынан көбі - шетелдік дәрілер», - дейді ол ОКҚ-да өтіп жатқан баспасөз мәслихатында.
Қанат Ержановтың айтуына қарағанда, Қазақстанда сатылып жатқан дәрілік заттар мен медициналық бұйымдар бойынша отандық үлес - 14 пайыз.
Еске сала кетсек, бұған дейін Қазақстан нарығында сатылатын дәрілік заттар мен медициналық бұйымдар үш сатыдан тұртын тексерістен өткізілетінін бұған дейін хабарлаған болатынбыз. Олардың біріншісі - бастапқы сараптама, екіншісі - мамандандырылған сараптама, ал үшіншісі - зертханалық сынақ. Ұлттық орталықтың облыстарда зертханалары бар.
