Дариға Назарбаева Атырауда «Батыс» өңірлік қолбасшылығы әскерінің жарақтандырылуын жоғары бағалады

АТЫРАУ. ҚазАқпарат  - Атырау облысында жүрген Сенаттың халықаралық қатынастар қорғаныс және қауіпсіздік комитетінің төрайымы Дариға Назарбаева  Атыраудағы «Батыс» өңірлік қолбасшылығының № 51051 әскери бөлімінде болған кезінде әскерлердің  жарақтандырылуын жоғары бағалады, деп хабарлайды «ҚазАқпарат» ХАА тілшісі.

Әскери бөлімде сенаторға  барлау  бөлімшесінің нысанды киімдерін, «Амфибия» бөлімшесінің, таулық, жалпы әскери, шабуылдау бөлімшесінің жабдықталуын, сондай-ақ салтанатты әскери киім нысанын көрсетті.

«Батыс» өңірлік әскерлерінің қолбасшысы, генерал-майор Дәулет Оспанов бөлімнің қалай құрылғандығы туралы әңгімеледі, сондай-ақ әскери трофейлер музейін көрсетті.

Танысу кезінде Дариға Назарбаева қазақстандық өнімдерге назар аударды.

Біздің әскердің қаруларында «Арлан» бронды машинасы, БТР-60 командалық бронды машина, жаңғыртылған цифрлы радиорелелік Р-409 стансасы, әмбебап ұтқыр байланыс кешені,   Талис» және «Тадиран» радиостансасы, АКМ-72 автоматы, ПП-90 тапанша-пулеметі бар.