Дәрігерлер көпірден құлаған қыздың жағдайы туралы айтты

АЛМАТЫ. ҚазАқпарат - Көпірден құлаған бойжеткеннің өмірін сақтап қалу үшін дәрігерлер барын салып жатыр, деп хабарлайды ҚазАқпарат тілшісі.

Қалалық Денсаулық сақтау басқармасының баспасөз қызметі хабарлағандай, қоңырау түскі сағат 13:00 шамасында Алтын Орда базары маңынан түскен. Оқиға орнына 8/90 қарқынды терапия бригадасы жетті. Жапа шеккен бойжеткен қалалық №7 ауруханаға жеткізілді.

«Ауруханада реаниматолог, нейрохирург, травматолог, хирург мамандар пациентті тексерді. Оның жағдайы өте ауыр деп бағаланып отыр. Қазіргі таңда барлық диагностикалық шаралар жасалып жатыр. Пациент жасанды тыныс алу аппаратына қосылды», - деді баспасөз қызметінен.

Еске сала кетейік, бүгін бойжеткен Алтын Ордадағы жаяу жүргіншілер көпірінен құлап кеткен болатын. Іле-шала жерде жатқан қызды көлік қағып кеткендігі туралы бұған дейін хабарлаған болатынбыз.