Дастан Сәтпаев «Бернли» сапындағы алғашқы толық матчын өткізді
АСТАНА. KAZINFORM – Қазақстандық шабуылшы Дастан Сәтпаев ағылшындық «Бернли» клубының сапында алғаш рет толық матч өткізіп, командадағы ең жоғары бағаны алды, деп хабарлайды Sports.kz.
18 жастағы қазақстандық футболшы Чемпионшиптің үшінші турында «Норвичке» қарсы матчта негізгі құрамда алаңға шығып, 90 минут толық ойнады. Кездесу 1:4 есебімен «Бернлидің» жеңілісімен аяқталды.
Flashscore Сәтпаевтың ойынына 7,5 балл берді. Бұл – «Бернли» футболшылары арасындағы ең жоғары көрсеткіш.
Матч барысында Дастан қарсылас қақпасына үш рет соққы жасап, оның біреуін қақпаға дәл бағыттады. Оның күтілетін гол көрсеткіші (xG) 0,15 болды. Сондай-ақ қарсылас айып алаңында допқа сегіз рет тиіп, сегіз дриблинг әрекетінің төртеуін сәтті орындады және өзіне қарсы бір ереже бұзуға себеп болды.
– Сәтпаев үш шешуші пас берді, оның күтілетін ассист көрсеткіші (xA) 0,39 болды. Сондай-ақ ол алаңның соңғы үштен бір бөлігіне бағытталған 14 пастың сегізін дәл жеткізіп, бір қауіпті сәт ұйымдастырды, – деп жазады басылым.
Жалпы қазақстандық шабуылшы 30 пастың 23-ін дәл жеткізді. Пас дәлдігі 77%-ды құрады.
Қорғаныста да Сәтпаев белсенділік танытты. Ол 11 жекпе-жектің төртеуінде жеңіске жетіп, екі рет допты қағып алды және үш мәрте допты өз командасының бақылауына қайтарды.
«Бернли» Чемпионшиптегі келесі кездесуін 3 қыркүйектен 4 қыркүйекке қараған түні өз алаңында «Мидлсброға» қарсы өткізеді.
Айта кетейік, Дастан Сәтпаев «Бернли» сапындағы алғашқы ойынын өткізді.
