Дәулет Тұрлыханов үлескерлер мұңын көтерді
АСТАНА. KAZINFORM — Соңғы екі жылда үлестік құрылыс саласындағы қылмыстық істер бойынша 16 адам сотталып, 300-ден астам компания әкімшілік жауапкершілікке тартылған. Бұл туралы Премьер-Министрдің бірінші орынбасары Роман Склярдың атына сауал жолдаған Мәжіліс депутаты Дәулет Тұрлыханов айтты.
«20 жыл өтсе де, алданған үлескерлердің мәселесі толық шешімін таппай келе жатыр. Оған көптеген сайлаушылардың арыз-өтініштері себеп болып отыр. Мыңдаған қазақстандықтар жауапсыз құрылыс салушыларға сенім артып, тұрғын үйсіз қалды. Оның ішінде зейнеткер де, тұрмысы нашар және көпбалалы отбасылар, жалғызбасты ана мен мүгедек жандар да бар. Бүгінде қолындағы бар қаражатын үйге салып, өздері пәтер жалдап жүрген халық көп. Қолдағы мәліметке сүйенсек, соңғы екі жылда үлестік құрылыс саласындағы қылмыстық істер бойынша 16 адам сотталып, 300-ден астам компания әкімшілік жауапкершілікке тартылған. Жуырдағы Үкіметтің кеңейтілген отырысында Мемлекет басшысы үлескерлік құрылыс проблемасына тағы тоқталып өткен болатын. Дегенмен нақты жұмыс әзірге байқалмайды», — деді Мәжіліс депутаты.
Мысалы, оның айтуынша, әлі күнге дейін құрылыс компаниялары азаматтарды үйді төмен бағамен береміз деп, алдап жүр. Нәтижесінде ақша да, уәде етілген «шаршы метр» де жоқ. Көбінесе құрылыс салушылардың заңсыз әрекеттері азаматтардың қаражатын алдын ала келісілген шарттар, инвестициялар сияқты заңсыз басқа бағытта жасалады.
«Астана қаласының аумағында 243 көппәтерлі тұрғын үй кешенінің құрылысы тоқтап, оған 40 мыңнан астам үлескер тартылған екен. Осы объектілердің әрқайсысының құрылысын аяқтау мемлекеттің тікелей қатысуын талап етеді. Құрылыс компаниялардың саны азайғанымен, негізгі проблема өзгерссіз тұр. Мысалы, астанамызда «Сатурн-1,2,3,4», «София» сияқты тұрғын-үй кешендері аяқталмаған, ал аяқталғанының құжаты реттелмеген. Сонымен қатар «Диана», „Оникс», «Аскер-1», «Аскер-2», «Хазар», «Оазис» сияқты ондаған жылдар бойы құжаты дұрысталмай, әлі күнге дейін қажетті инфрақұрылымдар жасалмаған тұрғын-үйлер жетерлік», — деді Дәулет Тұрлыханов.
Мәжіліс депутатының айтуынша, құрылысты қабылдау комиссиясының жұмысына қатысты да заң бұзушылықтар бар. Бұл тұрғын үй кешендерін пайдалануға қабылдайтын кезде байқалады. Жылдап күтіп, әзер қолы жеткен баспананы алғаннан кейін, азаматтарымыз шешілмеген проблемалармен соттың табалдырығын тоздыруда. Осылайша, еліміздегі құрылыс саласында біраз мәселелер туындап отыр.
«Оның ішінде жауапсыз құрылыс салушылардың санының өсуі, үлескерлердің құқықтарын қорғаудың тиімді тетіктерінің болмауы, сондай-ақ, мемлекеттік органдар тарапынан қатаң бақылау мен жүйелі талаптың болмауы бар. Осыған байланысты, тез арада еліміз бойынша үлкен проблема тудырып отырған құрылыс компанияларының және оның артында тұрған мыңдаған тағдырлы отбасылардың мәселелерін шешуді сұраймыз», — деді ол.
