Дәурен Абаев: Astana Hub - цифрлы технологиялар ғасырындағы уақыттың әмірі
АСТАНА. ҚазАқпарат - «Astana Hub» халықаралық ІТ-стартаптар технопаркінің ашылуы - цифрлы технологиялар ғасырындағы уақыттың әмірі екенін түсіну керек. Мұндай пікірді Хабар арнасындағы «Ашық диалог» бағдарламасында ҚР Ақпарат және коммуникациялар министрі Дәурен Абаев айтып өтті, деп хабарлайды ҚазАқпарат тілшісі.
«Astana Hub» жұмысын бастауда Бақытжан Әбдірұлы (Сағынтаев - авт.) да, Асқар Қуанышұлы (Жұмағалиев - авт.) да өте қарқынды жұмыс жүргізді. Сонымен бірге, бұл ретте Қазақстандағы ІТ-қауымдастықтардың да рөлін естен шығармау керек. Ойлап қарасақ, хаб жұмысының іске қосылуы - мемлекет пен ІТ-саланың күшті бірлестіре атқарған жұмысының нәтижесі болғаны анық. Өздеріңіз білетіндей, Президент технопарктің іске қосылуына өзі қатысып, ұсынылған тың технологиялармен танысып, бәріміз атқарған жұмысқа жақсы баға берді», - деді Дәурен Абаев.
Министр өз сөзінде атап өткендей, қарапайым тілмен айтқанда «Astana Hub» дегеніміз - отандық стартап индустриясының даму орталығы. Ол жоғары технологиялы жобаларды қолдауды мақсат тұтады. Сонымен бірге, Дәурен Абаевтың айтуына қарағанда, «Astana Hub» - бүкіл әлемнің қатысушыларына ашық. Ол үшін барлық құқықтық шарттар жасалған.
«Әрине, «Кремнийлі аңғар» (құрамына Apple, Facebook және Google кіретін АҚШ-тағы әйгілі корпорациялар мен компаниялардың штаб-пәтері орналасқан жер) деңгейіне жақындау үшін үлкен күш-жігер, талмас еңбек пен ауқымды инвестиция керек. Бірақ, мұндағы ой мен концепт бірдей. Цифрлы технологиялар ғасырында осындай орталықтарды құрудың өзі - уақыттың әмірі екенін түсіну керек. Біз технологиялық даму даңғылынан шаң қауып қала алмаймыз. Бізде барлық жағдай: дарынды жастар, жобаларға салым салуға дайын инвесторлар, өз тәжірибесімен бөлісуге дайын мамандар - бәрі бар. Мемлекет тек инфрақұрылым әзірлеп беруді, бәрін бір жерге тоғыстыруды, құқықтық мүмкіндіктерді құруды өзіне алды. Міне, осы жұмыстарды атқардық», - деді ол.
Министрдің айтуынша, ЭКСПО-ның мұрасы болмағанда, айтылған инфрақұрылымды Қазақстан тез арада сала алмас еді.
Еске сала кетсек, осыдан екі күн бұрын Елбасы Нұрсұлтан Назарбаевтың қатысуымен «Astana Hub» халықаралық ІТ-стартаптар технопаркінің жұмысы ресми түрде іске қосылған болатын.
