Дәурен Абаев: Түркістан облысында шаруа лимон бағын өсіріп, 5 млн теңге табыс тапқан
НҰР-СҰЛТАН. ҚазАқпарат - ҚР Ақпарат және қоғамдық даму министрі Дәурен Абаев «Хабар» арнасының «Ашық диалог» бағдарламасында Түркістан облысында лимон бағын өсірген шаруа туралы айтты, деп хабарлайды ҚазАқпарат тілшісі.
«Түркістан облысында Юлдаш Аблазев есімді азамат 10 сотық жерге лимон бағын өсірген шаруа тұрады. Ол былтыр осы бақтан 5 тонна лимон жинап, 5 миллион теңгеден астам табыс тапқан», - дейді Дәурен Абаев.
Ол 10 сотық жер - шағын бақша ғана екенін айтты.
«Биыл ол лимон бағын тағы да 10 сотыққа кеңейтуді жоспарлап отыр. Лимон ағаштарын отырғызып қойған. Шаруа оны күтіп-баптауда. Бұл еңбекқорлықтың жақсы үлгісі», - дейді министр.
