Денис Теннің шетелден келген достарының заттарын жымқырған азамат құрықталды

АСТАНА. 29 мамыр. ҚазАқпарат - Алматылық полиция қызметкерлеріне «Денис Тен және достары» атты мұз үстіндегі шоуға шақырылған екі елдің спортшы қыздарының жеке заттарын ұрлаған күдіктіні қолға түсіру үшін небәрі бір тәулік қажет болды.

Шоуға қатысушы 3 қыздың киім шешетін бөлмесінен қымбат айпадтар, ұялы телефон, ноутбук пен 5 мың АҚШ доллары ұрланған. Бұл туралы ҚР ІІМ мәліметтерінде хабарланды.

«Күзетшілерді, қызметкерлер құрамын және шоуды ұйымдастырушыларды жан-жақты сұрастырғанда, жедел тергеу амалдарына жәрдем беретін мәліметтер алынған жоқ. Дегенмен жедел іздестіру шараларының нәтижесінде криминалды полиция қызметкерлері 48 жастағы ШҚО-да туған азаматты ұстап, ол ұрлық жасағандығын мойындады»,-делінген хабарламада.

Күдіктіден ақшаның бір бөлігі мен ұрланған ұялы телефондардың бірі алынды.

Қазіргі таңда қылмыстық іс бойынша алдын ала тергеу жұмыстары жүргізілуде, күдікті уақытша оқшаулағышқа қамалды.