Денсаулық сақтау министрлігі жалпы білім ошақтарында санитарлық-эпидемияға қарсы іс-шаралар жүргізу туралы қаулы шығарды
АСТАНА. 18 тамыз. ҚазАқпарат - Инфекциялық аурулардың, тамақтан уланудың алдын алу, білім беру ұйымдарына қойылатын санитарлық-эпидемиологиялық талаптарды сақтау мақсатында ҚР Денсаулық сақтау министрлігі Мемлекеттік санитарлық-эпидемиологиялық қадағалау комитетінің төрағасы - ҚР Бас мемлекеттік санитарлық дәрігерінің міндетін атқарушы Н. Сәдуақасов «Жалпы білім беретін мектептер мен интернаттық ұйымдарда санитарлық-эпидемияға қарсы (профилактикалық) іс-шаралар жүргізу туралы» қаулы шығарды.
Бұл ақпаратты ҚР Денсаулық сақтау министрлігінің баспасөз қызметі таратып отыр.
Осы қаулыға сәйкес, облыстарың, Астана мен Алматы қалаларының мемлекеттік санитарлық-эпидемиологиялық қадағалау органдарына жалпы білім беретін мектептер мен интернаттық ұйымдардың 2011-2012 жаңа оқу жылына дайындығын бақылауға алуға, халықтың санитарлық-эпидемиологиялық салауаттылығы саласындағы заңнама талаптары бұзылған жағдайда, оларды пайдалануға тыйым салуға тапсырма берілді.
Мектептердің дайындық нәтижелерін денсаулық сақтау және білім беру басқармаларымен бірлескен кеңестерде талқылау жоспарлануда.
