Денсаулық сақтау саласына құйылатын инвестиция көлемі артты
АСТАНА. ҚазАқпарат - 2017 жылы денсаулық сақтау саласында негізгі капиталға құйылған инвестиция 1,4 есеге артты. Бұл туралы бүгін Үкімет отырысында 2016-2019 жылдарға арналған «Денсаулық» мемлекеттік бағдарламасының өткен жылғы қорытындысы бойынша есеп берген ҚР Ұлттық экономика министрі Тимур Сүлейменов айтты, деп хабарлайды ҚазАқпарат.
«Жалпы бағдарламада 3 мақсатты индикатор қарастырылған, 2017 жылдың қорытындысы бойынша барлық индикаторлар бойынша аралық мәндерге қол жеткізілді. 36 нәтиже көрсеткіштері қарастырылған, оның ішінде 5 көрсеткіш орындалмады. 123 іс-шара қарастырылған, оның ішінде 2017 жылы біту мерзімімен 47 іс-шара, оның ішінде 1 шара орындалмады, 9 шара мерзімінің бұзылуымен орындалды. Бағдарламаны іске асыруға 2017 жылы 180,3 млрд теңге бөлінді, оның 176,1 млрд теңгесі немесе 97,7 пайызы игерілді», - деді министр.
Сонымен қатар, ол 2017 жыл қорытындысы бойынша денсаулық сақтау жүйесінің көрсеткіштері экономиканың саласы ретінде оң динамикаға ие екендігін атап өтті.
«2017 жылғы қаңтар-желтоқсан аралығандағы денсаулық сақтау саласында негізгі капиталға құйылған инвестициялар 2016 жылғы 61 млрд теңгеден 91 млрд теңгеге дейін өсіп, 1,4 есеге артты. Өсім негізінде жеке инвестициялардың ұлғаюына және мемлекеттік-жекешелік әріптестік жобалардың іске асырылуына байланысты болды», - деді Тимур Сүлейменов.
