Депутат: Балаларын тастап кеткен мигранттарды ата-ана құқығынан айыру керек
АСТАНА. ҚазАқпарат - Бауыр еті балаларын тастап, шетелге жұмыс іздеп кеткен адамдарды ата-ана құқығынан айыру керек. Бұл мәлімдемені Қырғызстан Жоғарғы Кеңесінің депутаты Ырғал Қадыралиева жасады, деп хабарлайды КирТАГ.
«Менің ойымша, өз балаларын тастап, шетелге жұмыс істеуге кеткен мигранттарды ата-ана құқығынан айыру керек деп есептеймін», - деді ол.
Оның айтуынша, бүгінгі күні елдегі балалар үйі мен интернаттар шетелге кеткен жұмыскерлердің балаларымен толып қалған.
«Қазір балалар үйлерінде тәрбиеленіп жатқан балалардың ата-аналары бар. Олар өз перзенттерін «уақытша» деп тастап кеткен. Жалпы, ел бойынша балалар үйінде 11 мың бала тәрбиеленіп жатыр. Ал шын мәнісінде, олардың 3 мыңы ғана тұл жетімдер», - дейді депутат.
Депутаттың атап өтуінше, мемлекет ата-анасы тірі тұрғанына қарамастан, ол балаларды асырап бағуға қомақты қаржы бөліп отыр.
«Балаларын «уақытша» тастап кеткен ата-аналардың бірі мемлекетке көмектесіп отырған жоқ. Сондықтан, оларды ата-ана құқығынан айыру керек. Сонда басқа бала асырап алғысы келетіндерге мүмкіндік береміз. Болмаса балаларын тастап кеткендер сол перзенттерін асырауға қажетті қаржыны мемлекет қазынасына төлесін», - деген Ы.Қадыралиева.
