Депутат Ертаев генерал Мұxтаровқа: Сізге қару-жарақ саудасы туралы айтуға болмайды
АСТАНА. ҚазАқпарат - Бүгін ҚР Парламент Мәжілісінің пленарлық отырысында ҚР Қорғаныс вице-министрі Талғат Мұxтаров «Қару-жарақ саудасы туралы келісімді ратификациялау туралы» заң жобасын таныстырды. Төменгі палата аталған құжатты қолдады. Алайда депутат Бақытжан Ертаев генерал Мұxтаровқа ескерту жасады, деп xабарлайды ҚазАқпарат тілшісі.
«Талғат Сәбитұлы, Мемлекет басшысы, Жоғары Бас қолбасшы Нұрсұлтан Назарбаев сіздерді қару-жарақ саудасынан алыстатты. Ол жайында айтуға да рұқсат жоқ. Әскери адам өзінің қасиетті борышы - Отанды қорғаумен айналысуы қажет. Соған кәсіби тұрғыда дайын болу қажет. Ал басқа мәселелер үшін Қорғаныс және аэроғарыш өнеркәсібі министрлігі құрылған болатын. Неге біз «погонды» тағып алып, қару-жарақ саудасы туралы баяндап тұрмыз. Негізі, дәл қазір мінберде сіз емес, генерал мырза, басқа министрліктің өкілдері тұруы тиіс», - деді депутат Ертаев.
Вице-министр Мұxтаров аталған ескертудің орынды екенін жеткізді. «Аталған мәселе бұрыннан бері қорғаныс министрлігінің жұмыс жоспарында болған. Сол себепті бізге баяндауға тура келіп отыр», - деп атап көрсетті Мұxтаров.
Айта кетейік, отырыс барысында депутат Аманжан Жамалов ҚР Ұлттық төрағасы Данияр Ақышевтің атына сауал жолдап, блокчейн мен криптовалюталар бойынша ведомствоаралық комиссияны құруды ұсынды.
