Депутат Орал қаласындағы хоккей ойыны кезінде төбелесіп қалды

АСТАНА. ҚазАқпарат -  Жеңіс кубогына арналған хоккейден қалааралық турнир шеңберінде өткен «Орал» ХК (Орал) мен «Буревестник» ХК (Оренбург) арасындағы ойын кезінде қарсыластар төбелесіп қалды деп хабарлайды «Уральская Неделя» .

Бейне роликтен хоккей ойыны кезінде мәслихат депутаты, «Стекло-Сервис» ЖШС директоры Аркадий Рубцовтың қарсыласына жұдырық ала жүгірген сәті анық көрінеді.

Ойын барысында Рубцов «Буревестник» командасы ойыншыларының бірімен соқтығысып қалады. Бұл  басқа да ойыншылардың жаппай төбелесуіне алып келді.

Облыстық «Мұз айдыны спорт сарайы» БЖСМ директоры Есқабыл Жалмұрзиев бұл оқиғаға байланысты өзінің пікірін білдірді. «Бұл тек ойын сәтіндегі көрініс  ғана. Біреуге бірдеме ұнамай қалды, сосын ұрып жіберіп  төбелес басталды да кетті. Кейін қарсыластар бір-бірінің қолдарын қысып, татуласты»,- деді Есқабыл Жалмұрзиев.