Депутат Павел Казанцев Президенттің сұхбатын шағын Жолдауға теңеді
Мәжіліс депутаты Павел Казанцев Президент Қасым-Жомарт Тоқаевтың «Егемен Қазақстан» газетіне берген сұхбатын шағын Жолдауға теңеді, деп хабарлайды Kazinform.
«Бұл сұхбат бір жағынан жылды қорытындылады. Екінші жағынан елдің келешек бағдарын айқындаған сұхбат болды. Негізі бұл материал шағын бір аралық Жолдау сияқты. Қандай шаруа атқарылғаны, болашақта не істелетіні айтылған», — деді Павел Казанцев.
Оның пайымынша сұхбатта айтылған ұстанымдар елдің энергетика саласындағы саясаттың қалай өрбитінін айқындай түскен.
«Энергетика — ең маңызды саланың бірі. Өйткені қазір біз электр қуатының тапшылығына тап келіп отырмыз», — дейді депутат.
Мәжіліс өкілі қосарлаған билік туралы алыпқашпа әңгімелерге де осы сұхбатта нүкте қойылғанын айтады.
«Президент елде қосарланған билік болғанын осы жолы бірінші рет айтты-ау деймін. Бұл белгілі бір дәрежеде Қаңтар оқиғасына да түрткі болғаны айтылды. Өзінің бір мерзімге ғана сайланғанын, оны біз — депутаттар әрі қарай бекіте түсетінімізді тағы да қадап айтты. Конституция осындай жүйеге негізделіп толыққанын да атап өтті», — дейді Павел Казанцев.
