Депутаттар «Оңтүстік» өңірлік қолбасшылығында болды
Таразда бейсенбі күні мәжілісмендер Тараз гарнизонының бірқатар әскери бөлімшелеріне барды. Депутаттар Қазақстан құрлық әскерлері құрамындағы ең ірі бригадалардың бірі - 5-ші механизацияланған бригаданың оқу-материалдық базасымен танысып, оқу корпусын аралады.
ҚР Ұлттық гвардиясының полкі - 5513-әскери бөлімінде, ҚР ҰҚК Шекара қызметінің 2035-әскери бөлімінде болып, әскери қызметшілердің қызмет жағдайларымен танысты.
«Жамбыл облысы кездейсоқ таңдалған жоқ, мұнда «Оңтүстік» өңірлік қолбасшылығы округінің штабы, Шекара әскерлері комитеті орналасқан», - дейді генерал-лейтенант, Халық Қаһарманы Бақытжан Ертаев.
Оның айтуынша, бүгінгі таңда мемлекет әскери қызметшілерге толық көлемде әлеуметтік көмек көрсетуді қолға алып отыр.
Депутаттар шара аясында Бауыржан Момышұлының ескерткішіне гүл шоқтарын қойды. 
