Димаштың өнеріне деген сүйіспеншілік бізді біріктірді - фан-клуб әкімшісі

Қазақстан әншісінің жанкүйерлері үшін бұл жолғы басқосудың орны тіптен ерекше. Пандемия кезінде уақытша тоқтатылған «ARNAU» туры қайта жалғанып, фан-клуб мүшелері бір-бірімен кездесу мүмкіндігіне ие болды.

Шараны Dimash Multicultural Club әкімшісі Анна Людвиг пен Dimash Fanclub Deutschland өкілі Беттина Древенсек ұйымдастырған. Олар 70 елден жиналған 150-ден астам жанкүйердің көптен күткен концерт алдында осылай кездесуіне қолдау білдірген Қазақстанның Германиядағы Елшілігіне ризашылықтарын жеткізді.

«Ең алдымен, Қазақстан Елшілігіне алғыс айтамыз. 2 жылдан кейін баршамыздың осылай кездесуімізге мүмкіндік туғанына өте қуаныштымыз. «We Are One« (»Біз біргеміз« - ред.) - жай сөз емес. Dears (қымбатты жанкүйерлер - ред.) мәдениеті, тілі мен менталитетіндегі айырмашылықтарға қарамастан, бір-бірін үнемі қолдайды, жақсы көреді. Себебі, біздің барлығымызды Димаштың шығармашылығына деген сүйіспеншілік біріктірді», - дейді әншінің мультимәдени фан-клубының әкімшісі Анна Людвиг.

Елшілік өкілдері Димаштың шығармашылығына тәнті жандарға әншінің туған елі, оның мәдениеті мен салт-дәстүрлері жайлы айтып берді. Сондай-ақ, Қазақстанның табиғаты мен айшықты жерлерін таныстыратын көрме ұсынылды.

Еске сала кетейік, Германияның Дюссельдорф қаласында Димаштың жеке концерті өтетіні хабарланған болатын.