Дизайнерлерге: Жұмысыңды ұсын да 2 млн теңге ұтып ал
АСТАНА. ҚазАқпарат - «ҚазАқпарат» ХАА Елбасының «Рухани жаңғыру» бағдарламасын қолдау мақсатында ұйымдастырылған дизайнерлік шешімдер байқауына өтінімдерді қабылдауды жалғастыруда.
Конкурсқа ұсынылатын жобалар Елбасының «Рухани жаңғыру» бағдарламасында айтылған тақырыптық бағыттармен үйлесуі тиіс, атап айтқанда, қасиетті нысандар, киелі орындар, тарихи ескерткіштер; қазақ мәдениеті мен дәстүріне үйлескен элементтер; туған жерге деген махаббат; білім культі; бәсекелік қабілет; прагматизм; ұлттық бірегейлікті сақтау; Қазақстанның революциялық емес, эволюциялық дамуы; сананың ашықтығы.
Жеке тұлға немесе ұжым байқауға әр бағыт бойынша бір ғана жұмысын ұсына алады.
Байқау 1 қараша - 15 желтоқсан аралығында өтеді. Қатысушылар үшін жас ерекшеліктері бойынша шектеу жоқ.
Ең үздік туындыларды арнайы құрылған қазылар алқасы анықтайтын болады. Сондай-ақ ҚазАқпарат сайтында онлайн-дауыс беру өтеді.
Жеңімпаздарды марапаттау желтоқсан айының соңына жоспарланған. Гран-при иегері 2 млн теңге сыйақы алады.
Өзге жеңімпаздардың ақшалай жүлдесі:
1 орын - 1 500 000 теңге;
2 орын - 1 000 000 теңге;
3 орын - 500 000 теңге.
Конкурсқа қатысушыларды қосымша ынталандыру үшін жалпы сомасы 1 млн теңгені құрайтын арнайы сыйлықтар қарастырылған.
1 арнайы сыйлық - 400 000 теңге;
2 арнайы сыйлық - 400 000 теңге;
3 арнайы сыйлық - 200 000 теңге.
Байқау ережесімен https://kaz.inform.kz/news/contest сілтемесі бойынша танысуға болады. Өтінімдер konkursinform@gmail.com электрондық поштасына қабылданады.
