Донор елдер сириялықтарға көмектесу үшін тағы 7,5 миллиард еуро бөледі

сириялық
Фото: Kazinform

АСТАНА. KAZINFORM – Донор елдер Брюссельде өткен конференцияда азаматтық соғыс пен табиғи апаттардан зардап шеккен сириялықтарға көмек көрсету үшін тағы 7,5 миллиард еуро бөлуге келісті, деп жазады DW.

Дүйсенбі, 27 мамырда Брюссельде өткен конференцияда донор елдер Сирия халқы мен көрші елдердегі сириялық босқындарға көмек көрсету үшін тағы 7,5 миллиард еуро бөлуге келісті. 2024 жылы 3,8 миллиард еуро грант түрінде, тағы 1,2 миллиард еуро кейінірек бөлінеді. 2,5 миллиард еуро несие түрінде беріледі, деп хабарлайды Associated Press.

Германия осы соманың 1,053 миллиард еуросын бөледі, деді конференцияда Германия Сыртқы істер министрлігінің мемлекеттік министрі Тобиас Линднер. Бұл қаражат 2023 жылдың ақпанында аймақта болған және 59 мың адамның, оның ішінде 6 мыңы Сирияда қаза тапқан жантүршігерлік жер сілкінісінің салдарын жоюға жұмсалады.

Сириядағы азаматтық соғыс 2011 жылы басталған. Соғыс кезінде 500 мыңға жуық адам қаза тауып, дерлік 23 миллион тұрғыны бар елдің жартысына жуығы үйлерін тастап кетуге мәжбүр болды. Қазір көршілес Түркия, Ливан және Иордания мемлекеттерінде 5,7 миллион сириялық босқын бар. Башар Асад режимі мен оның қарсыластары арасындағы қақтығысты ішкі саяси жолмен шешу перспективасы әлі де көрінбей тұр.

2023 жылы Брюссельде өткен донорлық конференцияда сириялықтар үшін 5,6 миллиард еуро жиналды.

Германия босқындардың Сирияға күштеп қайтарылуына қарсы

Жақында Еуропалық Одақтың сегіз елі – Австрия, Грекия, Дания, Италия, Кипр, Мальта, Польша және Чехия Сириядағы жағдайды қайта қарауға шақырды. Олардың пікірінше, елде әлі «толық саяси тұрақтылыққа» қол жеткізілмегенімен, Сирияның кейбір аймақтары босқындардың ол жаққа оралуы үшін қазірдің өзінде қауіпсіз деп санауға болады. Бұл идеяны Сириядан келген 780 мыңға жуық босқын шағын ауданда тұратын Ливан үкіметі қолдап отыр.

Дегенмен Халықаралық Қызыл Крест комитеті сияқты халықаралық гуманитарлық ұйымдар қазір сириялық босқындардың жаппай оралуына жағдай жоқ деп есептейді. Линднер сондай-ақ Брюссельдегі конференцияда Германия үкіметінің елден қашқан сириялықтарды күштеп еліне қайтаруға қарсы екенін айтты.

«Біз анық айтуымыз керек: Сирияға қайту елдегі жағдай қауіпсіз болған кезде ғана мүмкін болады және тек ерікті түрде жүзеге асады», – деп келтіреді dpa баспасы оның сөзін.

Соңғы жаңалықтар
telegram