«Дос Көшім: Ұлттың жанашыры - сол ұлттың барлық өкілдері деп білемін» - баспасөзге шолу
АСТАНА. 8 маусым. ҚазАқпарат - «ҚазАқпарат» агенттігі республикалық басылымдарда 8 маусым, сенбі күні шыққан өзекті материалдарға шолуды ұсынады.
***
Кеше Мемлекет басшысы Нұрсұлтан Назарбаев отандық телеарналардан зейнетақы жүйесін реформалауға қатысты Қазақстан халқына үндеу жариялады. «Егемен Қазақстан» газетінің бүгінгі санында жарық көрген үндеуде: «Жалпы, мен Үкімет пен Ұлттық банктің жаңа зейнетақы заңнамасын халыққа түсіндіру жөніндегі жұмысына оң баға бере алмаймын. Біріншіден, осындай өте маңызды әлеуметтік заң жобасы немқұрайлы қаралды. Екіншіден, оны халыққа кеңінен насихаттау ісі дұрыс жүргізілген жоқ. Нәтижесінде, қазақстандықтардың көбі зейнетақы реформасының түпкі мәнін түсінбей қалды. Бүгінде зейнетақы заңнамасына өзгерістер енгізу керек екені анық! Бұл - жаһандық үрдіс. Еуропа одағы мен әлемнің өзге де елдері дағдарыс пен құлдырау жағдайында осылай жасауға мәжбүр болды», - делінген. Сөйтіп, Президент қиын түйінді тарқатты. Елбасымыз халыққа Үндеу арнап, зейнетақы реформасының қажеттігін дәлелдеп айтты, сонымен бірге оны жүзеге асырудың көкейге қонымды жолын да көрсетті.
«Егемен Қазақстан» газетінің жазуынша, Атбасар аудандық соты мен прокуратура ғимаратына 6 маусым күнгі 03 сағат 25 минутта белгісіз біреулер жанғыш зат құйылған шөлмектер мен тас лақтырған. Осының салдарынан сот ғимаратында өрт шығып, екі қабатты үйдің оң қанатын жалын шарпыды. Мекеме күзетшісі бұл туралы тиісті мекемелерге дер кезінде хабарлаған. Бірақ, ол бұзақылардың бет әлпетін анықтауға мүмкіндік болмағанын айтады. Облыстық ішкі істер департаменті баспасөз қызметінің жетекшісі Гүлнар Пинчуктің мәлімдеуінше, төтенше жағдай түн ортасында орын алғандықтан, зардап шеккендер жоқ. Әйтсе де сот төрағасының қызмет бөлмесі, мәжіліс залы, кеңсе мен істерді сараптау бөлмесіне елеулі зақым келтірілген. Қолда бар құжаттардың біршамасы, 4,5 шаршы метр аумақтағы жиһаздар жанып кеткен. Өртті ауыздықтауға Атбасар қаласындағы өрт сөндіру қызметінің үш арнайы техникасы мен бес адамдық бригада жұмылдырылыпты. Ақпарат «Тексеру жұмыстары атқарылуда» деген тақырыппен берілген.
***
«Айқын» газетінің бүгінгі санында «Ұлт тағдыры» қоғамдық қозғалысының төрағасы Дос Көшіммен арадағы сұхбат «Ұлттың жанашыры - сол ұлттың барлық өкілдері деп білемін» деген тақырыппен берілген. Басылым тілшісінің барлық сауалына тұщымды жауап берген ол : «Біздің қоғамның тілдік белгісіне қарап екіге жарылғаны да ешкімді таңғалдырмайды. Бір шаңырақтың астында өмір сүріп жатқан орыстілді қауым мен қазақтілді қауымның оқитын кітабы да, көретін киносы мен хабарлары да, әңгімелерінің тақырыптары да әртүрлі. Керек десеңіз, біздер әртүрлі оқиғаларға түрлі баға береміз (әсіресе, Шаңырақ оқиғасына, Желтоқсанға, немесе Жаңаөзен оқиғасына екітілдік ортаның бір-біріне қарама-қарсы пікір білдіргені бәрімізді де ойландыруы керек.) Біртілдік қауымның дұрыс дегені екіншісі үшін теріс деген баға алады... Бұл әралуандық мақсат бірлігіне алып келеді деп ешкім де айта алмайтын болар. Әсіресе, қазақ ұлтының өзекті мәселелеріне, оның шешілу жолдарына деген орыстілді қауымның көзқарасы сын көтермейді. Бұл тек «Лад» не «Славян, орыс және казак ұйымдарының асссоциациясы» сияқты бірді-екілі ұйымдардың үндеулерінен емес, қарапайым адамдармен пікірлескенде де ашық көзге түседі. Жер-су атауларын өзгертіп, тарихи атауларын қайтару мәселесінен бастап, қазақ мектептерін ашу мәселесіне дейін біздің алдымыздан түсіністік пен қолдаудың орнына үнсіз, дәлелсіз, ішкі қарсылық шығады. Әрине, мүмкін, менің бұл жеке пікірім - тым қатаң баға болар, бірақ ауруын жасырған...», - деді.
«Кеше еліміздің Бас прокурорының бірінші орынбасары Иоган Меркель Мешімбаева ханымның Ресейде «босқын мәртебесін» сұрауы мүмкіндігін де жоққа шығармады. Бұл күні Астанада посткеңестік кеңістік елдері прокурорларының саммиті өткен болатын. ТМД-ға қатысушы мемлекеттердің бас прокуратураларының халықаралық құрылымдары басшыларының кездесуіне солтүстік көршімізден келген делегация өкілдері бұл тақырыпқа түсініктеме бермеді. Өйткені бұл мәселе көші-қон қызметінің құзырына жататын көрінеді», - деп жазады «Айқын» газеті.
«Мешімбаеваның өзін Қазақстанға беру туралы шешімге Ресей Федерациясының аудандық сотынан бастап, Жоғарғы сотына дейін қарсылық білдіруге құқы бар. Бұл белгілі бір уақытты қажет етеді. Бұған қоса, А.Мешімбаева Ресейдің құзырлы органдарына жүгініп, өзіне босқын мәртебесін беруді сұрай алады. Бұл да белгілі бір уақытқа созылады», - деді И.Меркель.
