Достастық кубогының ширек финалында «Ақтөбе» Беларус чемпионы «МТЗ-РИПО» клубымен ойнайды
АСТАНА. Қаңтардың 21-і. ҚазАқпарат /Ернұр Ақанбай/ - «Ақтөбе» футбол клубы Мәскеуде өтіп жатқан ТМД және Балтық елдері чемпиондары кубогының турнирінде өзі сынға түскен «А» тобында бірінші орын алды.
Енді біздің команда жартылай финалға берілетін жолдамаға ие болу үшін Беларус чемпионы «МТЗ-РИПО» командасымен кездеседі, деп хабарлайды ҚазАқпарат.Айта кетейік, «Ақтөбе» «А» тобында Ресейдің «Рубин», Арменияның «Арарат» және Өзбекстанның «Пахтакор» клубтарына қарсы ойнады. Жерлестеріміз топтық кезеңдегі бірінші ойынында «Араратты» 3:1, екінші кездесуінде «Рубинді» 2:0 есебімен жеңді. Үшінші матчта «Пахтакормен» 1:1 есебімен тең ойнады. Сөйтіп 3 ойында 7 ұпаймен өз тобында бірінші орын алып, келесі кезеңге шықты. Достастық кубогының ширек финалында сондай-ақ Молдованың «Шериф» және Латвияның «Вентспилис», Литваның «Экранас» және Өзбекстанның «Пахтакор», Әзірбайжанның «Интер» және Тәжікстанның «Регар-Тадаз» командалары кездеседі. Матчтар бүгін, қаңтардың 21-де өтеді.
