ДСҰ-ға қосылу бойынша Еуроодақ пен Өзбекстан арасындағы келіссөз аяқталды

ТАШКЕНТ. KAZINFORM – Дүниежүзілік сауда ұйымына (ДСҰ) қосылу бойынша Өзбекстан мен Еуропа одағы арасында жүргізілген екіжақты келіссөз аяқтады, деп хабарлайды Kazinform агенттігінің меншікті тілшісі.

Бұл туралы ДСҰ мәселелері жөніндегі Өзбекстан президентінің арнайы өкілі Азизбек Урунов мәлім етті. Оның айтуы бойынша келіссөздер екі жыл бойы жүргізілген.

- Еуропа одағына мүше 27 мемлекеттің нарғына шығуға, тиісінше оның аясында жеңілдік алуға бағытталған келіссөздер сәтті аяқталды, - деп хабарлады Азизбек Урунов.

Оның мәлімдеуінше, Еуропа одағы Өзбекстанның ДСҰ-ға қосылуы бойынша келіссөзді аяқтаған 31-ші тарап саналады.

- Бір апта бұрын біз Панамамен де тиісті келісімге қол қойдық. Осылайша, бүгінгі таңда 31 елмен жүргізілген келіссөз өз мәресіне жетті. Енді 3 мемлекет қалды, - деді Азизбек Урунов.

Бұған дейін хабарлағанымыздай, Өзбекстан ДСҰ-ға қосылу келіссөздерін биыл аяқтауға ниетті.

ДСҰ-ға қосылу бойынша өзбек тарапы былтыр АҚШ және Қытаймен арада өткен келіссөздерді қорытындылады.