Дуатлон жеңімпаздары атанған астаналық отбасыларға Ыстықкөлге жолдамалар тапсырылды
АСТАНА. ҚазАқпарат- Астанада «Отбасылық дуатлон» өтті. Ата-аналар мен балаларға арналған жарыс Astana Triatlon Park кешенінің аумағында ұйымдастырылды, деп хабарлайды astana.kz.
Жарыс басталмас бұрын нұсқаушылар қатысушыларға жаттығу жасатты. Дуатлонға қҚатысушылар екі санатта жарысты: 9-11 және 12-14 жастағы балалары бар отбасылар. Отбасы мүшелері жеке қашықтықтарды бағындырды - әкелер 2 км, аналар велосипедпен 2 км, ал балалар 500 метрге жүгірді.
Дуатлонға Спорт және дене шынықтыру басқармасының басшысы Берік Маржықпаев та өз отбасымен қатысты.
9-11 жастағы балалары бар отбасылардың арасында Пономаревтар отбасы топ жарды, екінші жас санатында Жақсылықовтар жеңімпаз атанды. Жарыс жеңімпаздары Ыстықкөлге жолдамаларға ие болды. Екінші орын алған астаналықтар CrossfitCentre абонемент алды, үшінші орын алғандарға велосипедтер табысталды. Сонымен қатар, жарыс соңында лотерея ойнатылып, велосипед табысталды.
- Күйеуіммен және балаларыммен триатлонмен бір жарым жылдан бері айналысып жүрміз. Алдымен Орталық саябаққа барып жүрдік, содан кейін AstanaTriatlonpark салынды. Елордада осындай шаралардың ұйымдастырылатыны жақсы. Алдағы уақытта көптеген жарыстар өтеді, бүкіл отбасымызбен қатысамыз, - дейді Раушан Сағынтаева. Айта кетсек,оның отбасы 12-14 жас санатында 1-орын және 9-11 жас санатында 2-орын алды.
