Дүниежүзілік Банктің Doing Business рейтингінде Қазақстан 50-орынға тұрақтады
АСТАНА. ҚазАқпарат - Дүниежүзілік Банктің Doing Business рейтингінде Қазақстан 50-орынға тұрақтады. Бұл туралы бүгін ҚР Президенті жанындағы Орталық коммуникациялар қызметінде өткен брифингте Экономика және бюджеттік жоспарлау министрі Ерболат Досаев мәлім етті.
«2013 жылдың қазан айында жарияланған Дүниежүзілік Банктің Doing Business рейтингісі бойынша Қазақстан 3 тармаққа позициясын жақсартып, 189 елдің ішінен 50-орынды иеленді», - деді ол.
Оның атап өтуінше, Қазақстанның рейтингтегі позициясының жақсаруы Халыққа қызмет көрсету орталықтарында компанияларды тіркеу уақытының азаюының есебінен, сондай-ақ, меншікті тіркеу рәсімдерін тездетіп енгізудің арқасында орын алып отыр.
«Сондай-ақ, Қазақстан жекеменшікті тіркеу және салық салу деңгейі бойынша 20 көшбасшылар қатарына енді», - деді Е.Досаев.
