Дүниежүзілік ойындарға қатысатын қазақстандық каратэшілер белгілі болды

АСТАНА. KAZINFORM – Биыл жазда Қытайдың Чэнду қаласында өтетін XII Дүниежүзілік ойындарда (The World Games) ел намысын қорғайтын каратэшілер анықталды. 

ҚР Туризм және спорт министрлігі Спортты дамыту дирекциясының баспасөз қызметінің хабарлауынша, байрақты бәсекеге еліміздің атынан 6 спортшы қатысады.

Бұл қатардағы отандастарымыз: 

Мөлдір Жаңбырбай (-50 кг) 

Әсел Қанай (-61 кг) 

Софья Берульцева (+68 кг) 

Қайсар Алпысбай (-60 кг) 

Дидар Әмірәлі (-67 кг) 

Нұрқанат Әжіқанов (-75 кг) 

Айта кетерлігі, XII Дүниежүзілік ойындарда 96 каратэші жүлдеге таласады. Олар әлем чемпионаты және рейтинг нәтижесінде іріктелді. Каратэден жарыс 8-9 тамызға жоспарланған. 

Қазақстан құрамасы 2022 жылы АҚШ-тың Бирмингем қаласында өткен ХІ Дүниежүзілік ойында 4 медаль (1 алтын, 2 күміс, 1 қола) жеңіп алған. Нәтижесінде делегация Португалиямен бірдей көрсеткіш көрсетіп, жалпы есепе 37-сатыға тұрақтады. Алтынды Токио Олимпиадасының қола жүлдегері Софья Берульцева (+68 кг) жеңіп алған.

Осыған дейін хабарлағанымыздай, 7-17 тамыз аралығында Қытайда өтетін ХІІ Дүниежүзілік ойындарында олимпиадалық емес спорттың 35 түрінен жүлделер сарапқа салынып, әлемнің 72 ел/аймағынан 5 мыңнан аса спортшылар қатысады деп жоспарланып отыр.