«Душанбе - Мәскеу» жолаушылар пойызында тәжікстандық үш азамат героинмен ұсталды
АСТАНА. ҚазАқпарат - Қазақстан Республикасы ҰҚК Шекара қызметінің «Батыс» өңірлік басқармасына қарасты «Бейнеу» бақылау-өткізу бекетінің (Маңқыстау обл) шекара жасағы «Душанбе - Мәскеу» бағытында келе жатқан №329 жолаушылар пойызына "Барби" атты қызметтік иттің көмегімен шекаралық бақылау жасау кезінде бір вагонның астындағы су ағатын құбырдың ішіне жасырылған түйіншекті тауып алды.
Өзіндік иісі бар түйіншекті ашқан кезде оның ішіндегі зат «героин» болып шықты. Жалпы салмағын таразыға салып есептегенде 535 грамға жетіп жығылды. Бұл іске қатысы болуы мүмкін деген күдікпен тәжікстандық үш азамат ұсталды. Құқық қорғау органдары хабарландырылып, процессуалды жұмыстар басталды , деп хабарлайды ҚР ҰҚК ШҚ баспасөз қызметі.
