Дзюдошыларымыздың жүлдеге таласуға мүмкіндігі бар – бас бапкер Нұрбол Сүлейменов
АСТАНА. KAZINFORM – Парижде өтетін XXXIIІ Жазғы Олимпиада ойындарына дзюдодан Қазақстан ұлттық құрама командасынан 8 дзюдошы қатысады. Оның жетеуі – өз салмақ дәрежелерінде жекелей сайысқа қатысса, бір спортшы аралас-командалық жарыстың лицензиясына ие болған.
Осы орайда дзюдодан Қазақстан ерлер құрамасының бас бапкері Нұрбол Сүлейменов kazinform тілшісіне сұхбат беріп, спортшылардың Олимпиада ойындарына дайындығы туралы айтып берді.
«Қазақстан ұлттық құрама командасы Париж Олимпиадасы алдындағы соңғы дайындықтарын өте жоғары деңгейде пысықтап жатыр. Қазіргі таңда құрама Испаниядан елге оралып, Алматы облысында жаңадан салынған олимпиадалық кешенде соңғы оқу жаттығу жиынын өткізіп жатырмыз. Жаттығу жиыны 17 шілдеге дейін жалғасады. Ал 18 шілде күні Парижге Алматыдан аттанатын боламыз», - деп атап өтті бас бапкер.
Сонымен қатар, шәкірттері Олимпиадада қай күні жарысқа шығатынын, жүлдеге таласуға барлығының мүмкіндіктері бар екенін жасырмай атап өтті.
«Өздеріңіз білесіздер, Олимпиадада ерлер арасында 60 келіде Елдос Сметов, 66 келіде Ғұсман Қырғызбаев, 73 келіде Данияр Шамшаев,81 келіде Абылайхан Жұбаназар және 100 келіге дейінгі салмақта Нұрлыхан Шархан ел намысын қорғайды. Барлығы өз салмақтарының мықтылары. Елдос екі бірдей Олимпиадада елге жүлде сыйлады. Биыл да аянып қалмаймын деп отыр. Барлығының жүлдеге таласуға мүмкіндіктері бар. Дзюдошыларымыздан бірінші болып, 27 шілде күні Елдос Сметов сынға түседі. Жалпы, Олимпиада ойындарында дзюдо бойынша жарыстар 27 шілде мен 3 тамыз аралығына жоспарланған», - деді бас бапкер.
Естеріңізге сала кетейік, дзюдодан әйелдер арасында Әбиба Абужақынова (48 кг), Камила Берліқаш (+78 кг), Эсмигүл Куюлова (аралас-командалық жарыс) ел намысын қорғайды. Команданың үздігі Абиба Әбужақынова да 27 шілдеде татамиге шығады.
