Е.Досаев: Қазақстанның мемлекеттік сараптама жүйесі толықтай жаңғыртылады
«2016 жылдың 1 қаңтарынан бастап, жобалау сараптамаларының 50 пайызын жеке секторға бердік. 2019 жылға қарай біз сараптама қызметінің 90 пайызын жеке меншікке өткіземіз. Тек мемлекеттік маңызға ие нысандарға сараптама жасау мемсекторда қалады», - деп атап өтті министр.
ҚР ҰЭМ басшысының айтуынша, сараптама қызметімен айналысатын барлық ұйымдарға талап күшейтіледі.
«ҚР ҰЭМ-де 42 сараптама ұйымы тіркелген. Оларға қатысты талаптар нақты көрсетілген. Сонымен қатар осы сарапшылардың барлығына тұңғыш рет әкімшілік және қылмыстық жауапкершілік енгізіліп отыр», - деді Е.Досаев.
«Мониторинг қорытындысы бойынша, нарықта бәсекеге төтеп бере алған компаниялар қайсы екенін біз көретін боламыз. Жалпы бүгінде шектеу жоқ, порталда талапқа сай келетін әрбір білікті компания тіркеле алады», - деді ол.