Е.Нысанбаев: Су ресурстарын басқару мембағдарламасын іске асыру жоспары таяуда Үкіметте бекітіледі

АСТАНА. ҚазАқпарат - Су ресурстарын басқару мемлекеттік бағдарламасын іске асыру шараларының жоспары таяуда Үкіметте бекітіледі. Бұл туралы бүгін ҚР Президенті жанындағы Орталық коммуникациялар қызметінде өткен брифингте Қоршаған орта және су русурстары вице-министрі Ерлан Нысанбаев мәлім етті.

Оның атап өтуінше, Қазақстанның су ресурстарын басқарудың мемлекеттік бағдарламасын бекіту туралы Елбасы Жарлығына сәйкес, Қоршаған орта және су ресурстары министрлігі оны іске асыру бойынша іс-шаралар жоспарының жобасын әзірледі.

«Қазір мүдделі мемлекеттік органдарда келісуден өтуде және жақын аралықта Үкіметтің бекітуіне енгізілетін болады», - деді Е.Нысанбаев.

Вице-министрдің сөзіне қарағанда, 2014-2040 жылдары аралығында бағдарламаны жүзеге асыру үшін 8,2 трлн. теңге қажет. Оның 5,4 трлн. теңгесі республикалық және жергілікті бюджеттен бөлінетін болады. Ал 2,8 трлн. теңгесі - бюджеттен тыс қаражат.