Егер Головкин бәрін бірінші раундта сұлатып сала берсе, қарсылас табуы қиынға соғады - Дмитриев
АСТАНА. ҚазАқпарат - Геннадий Головкиннің алғашқы жаттықтырушысы Виктор Дмитриевтің пікірінше, қазақстандық боксшы американдық Вилли Монромен жекпе-жекті шоу үшін алтыншы раундқа дейін созған, деп хабарлайды Vesti.kz.
«Біздің жеңісімізге қуаныштымын. Қарағандының абыройы үшін, Қазақстанның абыройы үшін Гена тұра алды, нағыз азамат. Ол екінші раундта-ақ кездесудің нүктесін қоя алар еді. Бірақ Гена алты раундқа жалғастырды. Бұл дұрыс. Егер бәрін алғашқы раундта сұлатып сала берсе, оған қарсылас табу қиындай түсер еді Ал жанкүйерлер шоу көргісі келеді. Гена олардың бұл тілегін орындады»,-дейді Виктор Дмитриев.
Еске сала кетейік, бүгін Геннадий Головкин Калифорнияда америкалық боксшы кіші Вилли Монроны техникалық нокаутпен жеңді.
Бұл - қазақстандық боксшының кәсіби шаршы алаңдағы 33-ші жеңісі және мерейтойлық 30-шы нокауты.
