Егін егетін жерді пайдалануды мемлекеттік бақылауда қандай өзгерістер болады
НҰР-СҰЛТАН. ҚазАқпарат – ҚР АШМ Жер ресурстарын басқару комитетінің төрағасы – ҚР жерді пайдалану және қорғау жөніндегі бас мемлекеттік инспекторы Мұрат Теміржанов ауыл шаруашылығы мақсатындағы жерлерді пайдалануға мемлекеттік бақылауды жүргізудегі өзгерістер туралы айтып берді, деп хабарлайды ҚазАқпарат.
Оның айтуынша, жерді ұтымды және тиімді пайдалануға мемлекеттік бақылауды жетілдіру мақсатында бірқатар жұмыс атқарылған.
«Біріншісі – жердің пайдаланылуына мемлекеттік бақылау функциялары жергілікті атқарушы органдардан қайтарылды. 2014 жылдан бастап мемлекеттік бақылауды орталықсыздандыру аясында жерлердің пайдаланылуын бақылау жөніндегі функциялар толығымен облыстардың әкімдіктеріне жүктелді. Алайда жер қатынастарын басқару, беру және бақылау бір мемлекеттік органның құрамына кіргендіктен, белгілі бір сыбайлас жемқорлық қатері мен мүдделер қақтығысы туындады. Президент жанындағы Ұлттық қоғамдық сенім кеңесінің 2021 жылғы 19 наурыздағы отырысында Мемлекет басшысы берген тапсырмамен құрылған жер комиссиясы жоғарыда көрсетілген фактіге назар аударды. Ол сондай-ақ «орталық-өңір» қағидаты бойынша жерді ұтымды пайдалануға мемлекеттік бақылаудың бірыңғай вертикалін құруды ұсынды. Президенттің тапсырмасын орындау мақсатында 2021 жылы 30 маусымда жер қатынастарын дамыту мәселелері бойынша, соның ішінде жерді ұтымды пайдалануға мемлекеттік бақылаудың бірыңғай вертикалін көздейтін заңға қол қойылып, қабылданды», – деді М. Теміржанов орталық коммуникациялар қызметінде.
Комитет төрағасының айтуынша, жер беру жөніндегі функциялар әкімдіктерде қалды, ал әкімдіктердің жер беруді бақылау жөніндегі функциялары және аумақтық департаменттер құру арқылы жердің пайдаланылуын бақылау функциялары комитетке берілді.
Сондай-ақ, спикердің айтуынша, пайдаланылмайтын ауыл шаруашылығы жерлерін анықтау үшін ғарыштық мониторинг енгізілген. Пилоттық жоба 2020 жылы іске асырылды, ал 2021 жылы Қазақстанның бүкіл аумағы бойынша ғарыштық мониторинг енгізілді. Бұл әдіс қысқа мерзімде республиканың барлық ауыл шаруашылығы жерлерін пайдалануға талдау жасауға мүмкіндік береді. Космомониторинг нәтижелері бойынша пайдаланылмай жатқан 3,6 млн гектар жер өз еркімен қайтарылды.
Оған қоса, пайдаланылмайтын жерлерді мәжбүрлеп алып қою мерзімі қысқартылып, процедурасы жеңілдеді. Бұрын бұл механизм ұзақ болды және ондаған жылдар бойы пайдаланылмаған ауыл шаруашылығы жерлерінің тозуына алып келді. Биыл 3 қаңтарда Президент қол қойған заң пайдаланылмайтын жерлерді мәжбүрлеп алып қою мерзімін қатарынан екі жылдан бір жылға дейін қысқартуды және аталған орнына бармай-ақ космомониторинг әдісін енгізуді көздейді.
М.Теміржанов енді жосықсыз жер пайдаланушыларға қатысты шаралар уақытылы қабылданатынын атап өтті.
Бұл микрокәсіп субъектілерінің дүңгіршектерді заңсыз орнатуына және пайдаланылмайтын жерлер болған жағдайда ауыл шаруашылығын жүргізу үшін тұрғындарға жерлердің жетіспеушілігіне байланысты.
ШОБ субъектілеріне тексеру жүргізуге мораторий болғандықтан ҚР Ауыл шаруашылығы министрі мораторийдің қолданылу кезеңінде жерді пайдаланбау немесе ұтымсыз пайдалану мәселелері бойынша тексеру мүмкіндігі үшін «жаппай қауіп» ұғымын айқындау жөніндегі ұсынымдар бекітілген №223 бұйрық шығарды.
