Египетте бәдәуилер Шарм-эл-Шейхке барар жолды қоршап алды

АСТАНА. 21 қыркүйек. ҚазАқпарат - Бірнеше ондаған бәдәуилер сәрсенбіге қараған түні полицияға наразылық шарасы ретінде Египеттегі Синая түбегінде Каир - Шарм-эл-Шейх және Шарм-эл-Шейх - Дахаб бағытындағы тас жолдарын басып алды, деп хабарлайды Yтро.ru.

Жергілікті БАҚ мәліметтері бойынша, қазіргі уақытта әйгілі қызылтеңіздік курорттар Синая мен Египет астанасын жалғайтын жолдар Суэц арнасы түбіндегі тоннель аумағында жабылған. Одан бөлек, Шарм-эл-Шейхтен басқа танымал курорттық қала - Дахабқа шығатын жол да қоршауға алыныпты. Бәдәуилер жол жиегінде дөңгелектер жағып, автокөліктерді өткізбей тастаған. Соның салдарынан Суэц арнасының түбіндегі тоннель маңында үлкен автокөлік кептелісі түзілді.

Наразылық шарасын ұйымдастыруға жақын арада Шарм-эл-Шейх ауданында жер телімін жалға берушімен жалға беру құны жайында сөзге келісіп қалған екі жергілікті тұрғынның қамауға алынуы себеп болған.