Екібастұзда мектеп стадионынан ер адамның мүрдесі табылды

ПАВЛОДАР. KAZINFORM – Полиция оқыс оқиға бойынша қылмыстық іс қозғалғанын хабарлады.  

Екібастұздағы №13 орта мектептің стадионынан ер адамның мүрдесі табылды. Жедел жәрдем қызметі ер адамның бойында тіршілік белгілері жоқ екенін нақтылаған.

– Аталған оқиға бойынша қылмыстық іс қозғалды. Қайтыс болған адамның денесінде зорлық-зомбылық белгілері жоқ. Ер адамның өліміне қатысы болуы мүмкін жағдайлар анықталып жатыр. Өлімге не себеп болғаны тергеп-тексеру шараларынан соң белгілі болады, - деп хабарлады Павлодар облыстық полиция департаментінің баспасөз қызметінен.

Еске сала кетейік, жуықта Екібастұзда бала өліміне қатысты қылмыстық іс қозғалған болатын. Сәбидің анасы 1 жас 9 ай толған жеткіншегі дәрігерлердің қателігінен көз жұмғанын, соған орай кінәлі медицина қызметкерлерін жазалауды сұраған.

Ал ақпан айында Екібастұздағы сауда орталығының төбесі опырылуынан 5 адам зардап шекті.