Екі ай бұрын жоғалып кеткен павлодарлық жігіт өлі күйінде табылды
ПАВЛОДАР. ҚазАқпарат - Павлодарлық тергеушілер ҚР ҚК 105 бабы бойынша жас жігіттің өліміне қатысты істі сотқа дейінгі тергеу жұмыстарын бастады, деп хабарлады ІІД баспасөз қызметі.
Екі айдан бері із-түссіз жоғалғандар қатарында болған 21 жастағы қала тұрғыны Б.Н. денесі бүгін түнде табылды. Тергеу мүддесіне орай, ІІД оқиғаның анық-қанығын жарияламай отыр.
Ғаламторда жарияланған ақпаратқа, марқұмның туыстары мен таныстарының сөзіне сүйенсек, жас жігіттің денесі жеке аумақта, тұншықтырылған күйі табылған.
Жас жігіт 5 маусым күні жоғалып кеткен. Соңғы рет оны дүкенде көрген. Полициядан бөлек Б.Н. іздеуге еріктілер мен туыстары атсалысқан.
