Екі қазақстандық телеарна Геннадий Головкин мен Осуману Адаманың жекпе-жегін көрсетеді
АСТАНА. ҚазАқпарат - WBA және IBO нұсқалары бойынша орта салмақтағы бокстан әлем чемпионы қазақстандық Геннадий Головкин өз атағын сақтап қалуы үшін ганалық Осуману Адамамен жекпе- жекке шығады, деп хабарлады Vesti.kz. тілшісі.
Кездесу Монакода өтеді, жекпе-жекті отандық екі арна «Қазақстан» және KazSport тікелей эфирден көрсетеді. Головкин мен Адаманың қолғап түйістіруі боксшылар кешінің басты оқиғасына айналады: шаршы алаңға қарсыластар ақпанның 1-інен 2-іне қараған түні, сағат 2-ден 3-ке дейінгі аралықта шығады. Сонымен қатар, KazSport эфирде сағат 22.40-та бастап бәсекелерді түгелдей көрсетуді жоспарлап отыр. Ал «Қазақстан» арнасы Астана уақыты бойынша сағат 2.30-да тек қазақстандықтың қатысуымен өтетін айқасты ғана көрсетеді.
Айта кетейік, ойын алдында салмақтары өлшенді: екі спортшының да салмағы 72,2 кг (159,2 фунт) болып тең түсті. Қазақстандық үшін бұл өз мансабындағы 29-шы кездесу: ол 28 рет жеңіске жеткен, 25-і - нокаут. Ганалық 33-жасар боксшы 25 рет жекпе-жекке шығып, қарсыласын 16 рет сұлатып салған.
Еске сала кетейік, Головкин өзінің осының алдындағы айқасында америкалық Кертис Стивенсті нокаутқа жіберіп, мерзімінен бұрын аяқтаған еді.
