Екібастұзда тағы бір жылыжай ашылуы мүмкін

ПАВЛОДАР. ҚазАқпарат - Нұр-Сұлтан қаласында өтіп жатқан ХІІ экономикалық форум шеңберінде Павлодар облысының әкімі Болат Бақауов ресейлік «Экокультура» компаниясының өкілдерімен кездесіп, қияр өсіретін жылыжай салу мәселесін талқылады, деп хабарлайды pavlodarnews.kz.

Аталмыш кәсіпорын жұмысының негізгі бағыттары микротыңайтқыштар және өсімдіктерді қорғау құралдарын сату болып табылады.

Аймақ басшысы ресейлік кәсіпкерлерге жылыжайды Екібастұз қаласының жанындағы №1 ҚАЭС-тың аумағында орналастыруды ұсынды. Станцияда өндірілетін арзан электр және жылу энергиясы кәсіпорынға жылыжайды техникалық шарттармен қамтамасыз етуде маңызды рөл атқарады.

«Қазіргі кезде станцияда 25 Гигокалория қуат көздері бар.   1 кВатт құны 8 теңгені құрайды. Бұл ТМД елдері бойынша ең арзан баға», - деді облыс әкімі.

Ресейлік компанияның өкілдері көмірсутектің диоксидін алу мәселесі де мазалайтынын жеткізді.

Аймақ басшысы оларға Павлодар мұнай-химия зауытында өндірілетін көмірқышқыл газын сатып алуды ұсынды. Келіссөздер нәтижесінде тараптар Екібастұз станциясының жанынан жылыжай құрылысын бастау туралы келісімге келді.

Облыс әкімі инвесторларға қолдан келетін көмектің бәрін көрсетуге уәде берді.