Екібастұзда жоғалған балықшылар табылды
ЕКІБАСТҰЗ. ҚазАқпарат – Павлодар облысында балық аулауға кеткен екібастұздық екі азамат қар құрсауында қалды, деп хабарлайды ҚазАқпарат.
ҚР Ішкі істер министрлігінің Төтенше жағдайлар комитетінен мәлім еткендей, 15 қаңтар күні таңғы сағат 9:36-да Екібастұз қаласының «112» пультіне 13 қаңтар күні екі азамат балыққа кеткені туралы хабарлама түсті. 14 қаңтар сағат 14:00 шамасында ер азаматтардың бірі әйеліне қоңырау шалып, үйге қайта шыққаны туралы айтқан. Олар жолда боранға тап болып, 22:00 шамасында байланыс үзілген.
«Хабарламаны алған Екібастұз қалалық құтқару бөлімінің қызметшілері өтімділігі жоғары техникамен адамдарды іздеуге дереу аттанды. Анықталғандай, «ВАЗ-2106» көлігіне мінген екі балықшы Шідерті ауылынан 10 км жерде қар құрсауында қалған», - делінген ақпаратта.
Балықшылар іздеу жұмыстары басталғаннан кейін екі сағаттан соң табылды. Олардың жағдайы жақсы және медициналық қызмет қажет болмаған. Ер адамдар Шідерті ауылына эвакуацияланды.
