Екінші АЭС салуға қайтадан референдум өткізілмейді – Энергетика министрі
АСТАНА. KAZINFORM — Екінші АЭС салуға қайтадан референдум өткізу керек пе? Бұл сұраққа Энергетика министрі Алмасадам Сәтқалиев жауап берді.
Айта кетейік, 2024 жылы 6 қазан күні қазақстандықтар алғашқы атом электр станциясын салу мәселесі бойынша референдумда дауыс берді.
- Референдум өткізудің қажет жоқ. Заңнамаға сәйкес аталған станция Үкіметтің шешімі аясында салынады, - деп нақтылады Алмасадам Сәтқалиев Үкіметтің кеңейтілген отырысынан кейінгі баспасөз мәслихатында.
Бұдан бұрын хабарланғандай, Мемлекет басшысы Қасым-Жомарт Тоқаев алғашқы АЭС құрылысын тездетуді тапсырды.
Президент өз сөзінде Үкімет пен Парламент екінші ядролық стансаны қай аймақта салу қажет екені жөнінде ұсыныс беруі керек екенінін атап өтті.
Премьер-министр Олжас Бектенов Үкіметтің кеңейтілген отырысында елде салынуы мүмкін екінші және үшінші АЭС құрылысына арналған аумақтарды анықтау жұмыстары аяқталуға жақын екенін айтқан болатын.
