Экология министрі Леонардо Ди Каприоға бұқтырылған киік етін жолдай ма
АСТАНА. KAZINFORM — Таяуда танымал америкалық актер, Голливуд жұлдызы Леонардо Ди Каприо киік популяциясының қалпына келуіне байланысты Қазақстанға үндеу жасаған еді. Ол Үкіметті құттықтап, бірлескен күш-жігер арқылы табиғат қорғау саласында шынайы табысқа қол жеткізудің жарқын мысалы болғанымызды атап өтті. Осыған орай журналистер Экология және табиғи ресурстар министрі Ерлан Нысанбаевтың пікірін білген еді.
«Белгілі актер Леонардо Ди Каприо Қазақстан Үкіметіне киік санын көбейткені үшін алғыс айтты. Бірақ жағдай ол ойлағандай біржақты емес екені белгілі. Осыған байланысты сіз министр ретінде өз атыңыздан Ди Каприоға киік етінен жасалған консерві жібермейсіз бе?» деп сұрады журналистер Үкімет отырысынан кейін өткен брифингіде.
«Бір ғана танымал Голливуд актері Ди Каприо емес, халықаралық ұйымдар да 21 мың бас киікті көбейтіп, 2 миллионға жуық өсіргеніміз үшін алғыс хат жолдап жатыр. Сонымен бірге халықаралық ұйымдар мәселенің екінші жағын қабылдап отыр. Киік санын реттеу керектігін де, әлемде мұндай тәжірибе бар екенін де түсініп отыр», — деді министр.
Ерлан Нысанбаев киік санының табиғи реттелу құбылысын бұзған адам екенін еске салды.
«Тағы да айтам, киік санының табиғи реттелу құбылысын бұзған өзіміз кінәліміз. Енді бүгін қолдан реттеуге мәжбүрміз. Өйткені ауыл шаруашылығына шығын келтіріп жатыр. Консервіге келсек, бір жерде сатылып жатса, өзім сатып алып, дәмін көрем. Шын мәнінде ол туралы ойламаппын да», — деді ол.
