Экология министрлігі Кіші Талдыкөл тағдырына қатысты: Қосымша зерттеу жүргізу қажет

НҰР-СҰЛТАН. ҚазАқпарат – Бүгінде елорда іргесіндегі Кіші Талдыкөл тағдыры қоғамда кеңінен талқыға түсіп жатыр. Эко-белсенділер мен жанашырлар көлді сақтап қалуды сұрап отыр. Осы орайда аталған көлдің одан әрі тағдыры не болады? Көпшілікті мазалаған мәселеге қатысты ҚР Экология, геология және табиғи ресурстар министрлігі ресми түсініктеме берді, деп хабарлайды ҚазАқпарат тілшісі.

«Талдыкөл - су объектісі. Елорда әкімдігі өз құзыреті аясында аталған су қорын елді мекендік жер санатына ауыстыру туралы қаулы шығарды. Су қоры жерлерін басқа санатқа ауыстыру ол табиғи және жасанды түрде жойылған жағдайда, сондай-ақ ондағы су көлемі азайған кезде ауыстырылады. Осы орайда Кіші Талдыкөлдің қанша бөлігі табиғи себеппен жоғалды және маңында жүріп жатқан құрылыс салдарынан көлдің көлемі қаншалықты кішірейгенін зерттеу қажет», - деп түсіндірді аталған ведомостводан.

Министрліктің ресми хабарына сүйенсек, алдымен көлге қатысты қосымша зерттеулер жүргізіп, оның нәтижесіне қарай түпкілікті шешім қабылдау қажет.

«Министрліктің ұстанымы - Кіші Талдыкөл су объектісі ретінде қалдырылсын. Осы ретте көлге қаладан келетін жауын-шашын және түрлі су қалдығы ағынының азайғаны байқалады. Көлді қосымша сумен толтырып, оның тіршілігін қайта жандандыруға қатысты шаралар қабылдау қажет», - делінген хабарламада.

Еске сала кетсек, жақында елорда әкімдігі аталған көлдің тағдырына қатысты өз ұстанымын алға тартты.

Сондай-ақ, жуырда Кіші Талдыкөлге бір топ қоқиқаз ұшып келді. Осыған байланысты аталған мекен аз уақыттың ішінде елорда тұрғындары мен қала қонақтарының туристік және демалыс орнына айналып үлгерді.