Экспортқа ветеринарлық сертификатты беру 14 күннен 1 сағатқа дейін қысқарады
АСТАНА. ҚазАқпарат - Биыл ҚР Ауыл шаруашылығы министрлігі ветеринарлық әрі фитосанитарлық қауіпсіздік саласында рұқсатнамалық құжаттарды берудің барлық процестерін автоматтандырады, деп хабарлайды ҚазАқпарат.
«Мәселен, процестерді әрі мәлімет алуды автоматтандыру есебінен экспортқа ветеринарлық сертификатты беру мерзімі 14 күннен 1 сағатқа дейін қысқарады», - деп нақтылады ҚР Ауыл шаруашылығы бірінші вице-министрі Арман Евниев Үкімет отырысында.
Оның сөзіне қарағанда, бүгінде ветеринарлық және фитосанитарлық қауіпсіздік бойынша ілеспелі әрі рұқсатнамалы құжаттарды қарастырудың 13-інің ішінде 9-ы автоматтандырылған, алайда құжаттар қағаз түрінде беріледі.
2018 жылы олардың барлығы автоматтандырылады. Жалпы, министрлік мемқызметтердің 101 түрін іске асырады, оның арасында ішінара 62-сі автоматтандырылды.
Алдағы екі жылда мемқызметтердің 89-ын толықтай автоматтандыру жоспарланып отыр. Оның ішінде АӨК-ті қаржыландыру, өнім өткізу мен экспорттау шаралары, мемлекеттік бақылау, су және биоресурстарды басқару тәртіптері қамтылады.
