Ел астанасы Орынбордан Қызылордаға көшкенде жеткен тарихи үстел мектеп музейінде тұр

ҚЫЗЫЛОРДА. KAZINFORM – Осыдан тура жүз жыл бұрын ел астанасы Орынбордан Қызылордаға көшкенде жеткен үстел қаладағы мектептердің бірінде сақтаулы тұр.

«Ұлағат» жеке мектебінің құрылтайшысы, қаржыгер Қалқазбек Әжібеков тарихи жәдігерді көп жылдан бері көзінің қарашығындай сақтап келеді. Оны қаржы басқармасын басқарып тұрғанда сондағы музей қорын толықтыру барысында тапқан. 

– 1988 жылы Ұлттық банкке барғанмын. Сол кезде шаруашылық жөніндегі бөлім бастығы Ербай Шағдаровтың кабинетіндегі үлкен оюлы үстелге көзім түскені бар. Кейін музей ашылғанда соны іздедім. Ерекеңе барсам, алдында жаңа үстел. Бұрынғысын жарамсыз деп сарайға шығарып тастаған екен. Шаң басып тұрған жерінен музейге әкеп қойдым, – деді Қалқазбек Әжібеков. 

Арада біраз жыл өткесін музей жабылып, жәдігерді қайтадан қоймаға шығаруға тура келеді. Беріде ғана білім ордасының төрінен оған орын табылды. Мектеп құрылтайшысы сыры кетіп, тоза бастаған мүлікті ұстаға қашатып, жөндетіп алды. Айтпақшы, бұл үстелді ең бірінші Қазақ АКСР Мемлекеттік банк басшысы пайдаланған. 

Еске салайық, биыл – Қызылорда қаласының Қазақ АКСР-інің астанасы атанғанына 100 жыл.