Эль-Ниньо Дүниежүзілік мұхиттың рекордтық деңгейде жылынуына себеп болды
АСТАНА.KAZINFORM - 2026 жылғы қыркүйекте Дүниежүзілік мұхит бетінің орташа температурасы Цельсий бойынша 21,05 градусқа жетіп, осы ай үшін жаңа рекорд орнатты, деп хабарлайды БЕЛТА.
БЕЛТА-ның France 24 басылымына сілтеме жасап хабарлауынша, тиісті деректерді Еуропаның Copernicus климаттық мониторинг қызметі ұсынған.
Қыркүйекте Дүниежүзілік мұхит бетінің орташа температурасы Цельсий бойынша 21,05 градус болды. Бұл 2023 жылы тіркелген алдыңғы қыркүйек рекордынан жоғары. Сол кезде көрсеткіш 20,92 градусқа жеткен еді.
Метеорологтар рекордтық жылынудың негізгі себебі ретінде 2026 жылы қарқындылығы жоғары болған Эль-Ниньо табиғи климаттық құбылысының күшеюін атайды.
Синоптиктер бірнеше айдан бері биылғы Эль-Ниньо бақылау тарихындағы ең күшті құбылысқа айналуы мүмкін екенін ескертіп келеді.
Copernicus бағалауынша, қыркүйектегі көрсеткіштер құбылыстың шарықтау шегіне әлі жетпегеніне қарамастан, Эль-Ниньоның аса күшті екенін көрсетеді.
Эль-Ниньо Тынық мұхитының экваторлық бөлігіндегі жерүсті сулары температурасының жоғарылауымен байланысты және әлемнің әртүрлі өңірлеріндегі ауа райына әсер етеді. Бұл құбылыс құрғақшылық пен су тасқыны қаупін арттырып, антропогендік жаһандық жылынудың әсерін күшейтуі мүмкін.
Бұған дейін Эль-Ниньо климаттық құбылысы күшейе беретіні және болжам бойынша 2026 жылғы желтоқсанда шарықтау шегіне жететіні хабарланған болатын.
