Елбасы Иранның Сыртқы істер министрімен кездесті
АСТАНА. ҚазАқпарат - Тәуелсіздік сарайында Қазақстан Президенті Иран Ислам Республикасының Сыртқы істер министрі Мохаммад-Джавад Зарифпен кездесті, деп хабарлайды Ақорданың баспасөз қызметі.
Мемлекет басшысы кездесуде Сыртқы істер министріне Шанхай ынтымақтастық ұйымына мүше мемлекеттер басшыларының кеңесіне және «ЭКСПО-2017» халықаралық көрмесінің ашылуына қатысуға келгені үшін алғыс айтты.
Нұрсұлтан Назарбаев Иранда өткен сайлауда қазіргі Президент Х.Руханидің жеңіске жеткені туралы хабарды ризашылықпен қабылдағанын атап өтті.
- Мені ислам әлемінде орын алып отырған қарама-қайшылықтар қатты алаңдатады. Өзара түсіністік пен сенім тезірек орнайды деп үміттенемін, - деді Нұрсұлтан Назарбаев.
Сыртқы істер министрі Қазақстан Президентіне қонақжайлық көрсеткені үшін ризашылығын білдірді.
- Елдеріміз арасындағы қарым-қатынастар жоғары деңгейде. Сіздің және Иран Президентінің өзара сапарларыңыздың арқасында олар қарқынды дамуда, - деді М.Зариф.
Сондай-ақ, М.Зариф Қазақстанның БҰҰ Қауіпсіздік Кеңесінің тұрақты емес мүшесі болып сайлануымен құттықтады.
Фото: Ақорданың баспасөз қызметі
