Елбасы медальдарымен марапатталған 18 қарағандылық білім грантын алды

ҚАРАҒАНДЫ. ҚазАқпарат – Білім гранттарын алуға арналған конкурсқа Елбасының 821 медаль иегері қатысты. Ұпай санымен салыстырғанда басымдыққа ие болған жобаға қатысушы 605 талапкер тегін оқуға мүмкіндік алды. Оның 18-і Қарағанды облысынан, деп хабарлайды ҚазАқпарат тілшісі.

Гранттардың ең көбін Нұр-Сұлтан мен Алматы, сондай-ақ Қызылорда мен Павлодар облыстарының болашақ студенттері алды. Медаль иегерлері арасында ең танымал оқу орындары Әл-Фараби атындағы Қазақ ұлттық университеті, Л.Н. Гумилев атындағы Еуразия ұлттық университеті, Сүлеймен Демирел атындағы Университет және Astana IT University болды.

«Елбасы академиясы жобаларының әрбір қатысушысы -біздің мақтанышымыз. «Елбасы медалі» жобасы дарынды жастар, әсіресе ауыл балалары үшін маңызды қолдау болатынын көріп отырмыз. Жақын арада біз жастарды қолдау үшін тағы да бірнеше жобаны іске қосуды жоспарлап отырмыз және оларға тұрғылықты жеріне қарамастан, әрбір жас қазақстандықты қатысуға шақырамыз», – деді «Елбасы академиясы» КҚ директоры Асланбек Амрин.

Ұлттық деңгейдегі жоба жастарды кешенді дамытуға бағытталғанын еске сала кетейік. Бағдарлама жеті негізгі бағыттан тұрады: спорт, таланттар мен дағдылар, кітап оқу, ұлттық мұра, волонтерлік, экспедициялар мен жорықтар, еңбек тәжірибесі. Бағдарлама 14 пен 29 жас аралығындағы жастарға арналған.