Елбасы саясаты арқасында елімізге оралдық - оралман пікірі

ОРАЛ. Қаңтардың 5-і. ҚазАқпарат /Ғайсағали Ералы/ - Елбасымыз Нұрсұлтан Назарбаевтың парасатты саясаты арқасында елімізге оралдық. Орал қаласында тұратын Еламан Ерқалиевтің ҚазАқпарат тілшісіне мәлім еткеніндей, олар 2004 жылы Қарақалпақстаннан алты отбасы көшіп келген.

Бәрі де азаматтық, тиесілі қаражат, жер алған. Өзінің жасы 53-те, мамандығы құрылысшы. Жер алысымен үй салып алған. Ұлы Қанат Атырауда электрик болса, екінші ұлы Саламат Зашаған кентінде дәнекерлеуші болып еңбек етеді. «Ең бастысы ? балаларымыздың болашағы үшін түн ұйқымызды төрт бөліп, қайғырмаймыз. Тіліміз, дініміз сақталды. Ақ Жайықтың қонақжай халқы бізді бірден бауырына тартып, қамқор болды. Қазір көршілерімізбен жақын туыстай болып кеттік. Тағдыр қосып, дос-жаранмен құда болып, келін де түсірдік. Енді «Нұрлы көш» бағдарламасы жүзеге асса, тіпті нұр үстіне нұр болар еді. Өйткені біз өзбек еліндегі қандастарымызбен хабарласып тұрамыз. Олардың бар арманы ? Қазақстанға келіп, еңбек ету, ұрпағын өсіру. Бұрын өзіміз тұрған Тахетаж қаласынан 10-15 үй көшіп келуге әзір. Шетте жүрген ағайындардың елге көбірек көшіп келуі үшін олардың жер телімін жалпы кезекпен емес, жеңілдетілген түрде алуына жағдай жасалса, орынды болар еді деп ойлаймыз», дейді ол.