Электронды медициналық кітапша қаржыны үнемдейді – министрлік

АСТАНА. KAZINFORM – 2025 жылдан бастап медициналық кітапшаны электронды форматқа ауыстырылады. Бұл туралы Денсаулық сақтау министрінің орынбасары Ербол Оспанов мәлім етті.

«Бүгінде 1,6 млн адамның жұмыс істеуге рұқсат берілген жеке медициналық кітапшасы бар. Оның ішінде қоғамдық тамақтану саласында — 780 мың, білім беру саласында — 550 мың, денсаулық сақтау саласында — 272 мың және жеке секторда — 52 мыңға жетті. Осылайша әр азамат жеке медициналық кітапшасын бірнеше ұйымда ұсына алады, бұл ақшаны үнемдеуге көмектеседі», - деді Ербол Оспанов Орталық коммуникациялар қызметі алаңында өткен баспасөз мәслихатында.

Вице-министрдің айтуынша, электронды медициналық кітапшаның тағы бір артықшылығы қолдан жасауға жол бермейді. Одан әрі Ербол Оспанов дәрі-дәрмек мәселесін көтерді.

«Биыл шілде айынан бері елімізде 68 млн-нан астам дәрі-дәрмек қаптамасы таңбаланды. Оның ішінде 39,3 млн қаптама импортқа тиесілі және 29,4 млн қаптама отандық өндіріс, жалпы айналымда 28,5 млн препарат бар», - дейді ол.

Еске сала кетсек, жеке медициналық кітапшаны электронды форматқа ауыстыру туралы былтыр айтылған еді.