Елена Рыбакина Токио WTA 500 турнирінен неге бас тартқанын түсіндірді

Қазақстанның бірінші, әлемнің 5-ракеткасы Елена Рыбакина Токио WTA 500 турнирінде ойнаудан неге бас тартқанын түсіндірді, деп хабарлайды ҚазАқпарат тілшісі.

Аталмыш ірі жарыстың алғашқы айналымында қазақстандық теннисші чехиялық Линда Носковамен шеберлік байқасуы керек еді.

Е.Рыбакина «Спорт Шредингера» телеграм-каналында былай деп жазды.

«Биыл Токиодағы турнирден бас тартуға мәжбүр болғаным өте өкінішті. Мен бұл жарысқа қатысқым-ақ келді, бұл қала өте ұнайды. Мен ең алдымен өзімнің денсаулығыма және бабыма мән беруге тиіспін. 100 пайыз дайын болу үшін маған уақыт керек», - деп жазды Е.Рыбакина.
Қазақстандық теннисшіні Токио додасында рейтингіде 181-орында тұрған жапониялық Химено Сакацумэ ауыстырады.
Еске сала кетейік, бұдан бұрын қазақстандық теннисшілердің Азия ойындарын сәтті бастағанын жазған едік.