Елге ресми сапармен келген Словения Президенті Димаштың жанкүйері екенін айтты
АСТАНА. KAZINFORM – Димаш Құдайберген Словения Президенті Наташа Пирц-Мусар алдында ән салып, мәртебелі мейманды өнерімен тәнті етті.
- Шағын құрамдағы келіссөз барысында Наташа Пирц-Мусар Қасым-Жомарт Тоқаевқа Димаш Құдайбергеннің жанкүйері екенін айтты. Мемлекет басшысы мәртебелі мейманды салтанатты қабылдау барысында оның кумирі өнер көрсететіндігін айтып қуантты. Словения Президентінің қуанғаны соншалық, бірнеше мәрте қайталап сұрады.
Қабылдау барысында Пирц-Мусар Димаштың қолын қысып, бұған дейін оның концертінде болғанын айтты. Димаш бұл жайында естігенін, мұндай ізетке сүйсінгенін атап өтті.
Шығармашылық дипломатия дегеніміз осы, - деп жазды PRESIDENT жобасының авторы әрі жүргізушісі Әділ Балтабаев Telegram-да.
Салтанатты қабылдауда Димаш Құдайберген «Дайдидау» және «S. O. S.» әндерін орындады.
Айта кетейік, бүгін Ақордада елімізге ресми сапармен келген Словения Президенті Наташа Пирц-Мусармен келіссөздерден кейінгі БАҚ өкілдеріне арналған бірлескен мәлімдеме барысында Мемлекет басшысы Қасым-Жомарт Тоқаев бұл елмен қандай салаларда тың жобалар жүзеге асырылатындығын айтқан еді.
Сондай-ақ Словения Президенті Наташа Пирц-Мусар Nazarbayev University-ге барып, «Жан-жақтылықтың төмендеуі — аңыз ба, әлде шындық па?» тақырыбында дәріс оқыды.
