Елімізде 35 мыңға жуық жетім бала болса, соның 85,5 пайызы баспанаға қол жеткізе алмай жүр
АСТАНА. 24 желтоқсан. ҚазАқпарат - Қазақстанда жетім және ата-ана қамқорлығынсыз қалған балалар саны 34 785-ті құрайды. Осы 35 мыңға жуық баланың 85,5 пайызы, яғни 29 мың 382-ісі баспанаға қол жеткізе алмай жүр. Бұл туралы бүгін Мәжілістің Әлеуметтік-мәдени даму комитетінде депутаттар «Қазақстан Республикасының кейбір заңнамалық актілеріне жетім балалар мен ата-анасының қамқорлығынсыз қалған балалардың тұрғын үйге құқықтарын қамтамасыз ету мәселелері бойынша өзгерістер мен толықтырулар енгізу туралы» заң жобасын талқылау барысында мәлім болды.
Білім және ғылым вице-министрі Саят Шаяхметовтің айтуынша, бүгінгі таңда елімізде 21 736 жетім бала қамқоршылыққа алынып, отбасыларда тәрбиеленіп жатыр. Оның ішінде 4 287 баланың бекітілген тұрғын үйі бар болса, 9 174 бала баспана кезегінде тұр. Патронаттық тәрбиедегі 2 162 баланың 420-сының тұрғын үйге қолы жетсе, осындай тәрбиедегі 1 068 бала баспанадан үміттеніп, әлі кезек күтуде. Ал балалар үйінде тұрып жатқан 10 887 баланың тек 696-сы ғана баспаналы болса, 8 168 бала үй кезегіне қойылған.
«Сонымен қатар, соңғы жеті жылда, яғни 2006 жылдан бері жетім балалар мен ата-анасының қамқорлығынсыз қалған балаларға арналған ұйымдардың 784 түлегі ғана баспаналы болды. Ал осы жылдары жетімдер үйінен барлығы 14 376 бала тәрбиеленіп шыққан болатын. Оның 6091-і кезекке қойылды», - деді вице-министр.
